18 ноябри соли 2021 дар толори Маркази таълимии инноватсионии Донишгоҳи техникии Тоҷикистон ба номи академик М.С. Осимӣ бо иштироки муовини Вазири маориф ва илми Ҷумҳурии Тоҷикистон Собирзода Нуралӣ Миралӣ ва кормандони Вазорат, ҳайати лоиҳаи “Рушди таҳсилоти олӣ” ва намояндагони муассисаҳои таҳсилоти олии касбии кишвар семинари омӯзишӣ оид таҳияи дархостҳо барои таҷҳизоти таълимӣ ҷиҳати беҳтар намудани муҳити таълим баргузор гардид.
Семинари мазкур бо мақсади дастгирии муассисаҳои таҳсилоти олии касбии кишвар дар омода намудани дархостҳо барои ба даст овардани таҷҳизоти иттилоотию коммункатсионӣ ва лабораторӣ ҷиҳати беҳтар намудани муҳити таълим ва сифати таҳсилоти олӣ гузаронида шуд. Дар семинар бо сухани муқаддимавӣ муовини Вазири маориф ва илми Ҷумҳурии Тоҷикистон Собирзода Нуралӣ баромад намуда, оид ба масъалаҳои раванди татбиқи лоиҳаҳои грантӣ, натиҷаҳои ба дастовардашуда, беҳтар намудани фазо ва сифати таълим дар муассисаҳои таҳсилоти олии касбӣ тавассути муҷҷаҳҳаз намудани синфхонаҳо ва лабораторияҳо бо технологияи муосир ва инноватсионӣ изҳори назар намуданд. Инчунин, ҳамоҳангсози лоиҳаи “Рушди таҳсилоти олӣ” Саидзода Халимҷон оид ба иштирок маъсулини муассисаҳои таҳсилоти олии касбӣ дар таҳқиқот вобаста ба пайгирии хатмкунандагони ба шуғл сухаронӣ намуда, тавсияҳо пешниҳод намуд.
Дар семинар масъалаҳо оид ба амалисозии зерқисмати 1.3. “Беҳтар намудани шароити таълим дар МТОК”, ҳадафҳо ва раванди татбиқи зерқисмат, тартиби таҳия ва пешниҳоди дархостҳо аз тарафи муассисаҳои таҳсилоти олии касбӣ, инчунин арзёбии дархостҳо барои таҷҳизоти лабораторӣ ва технологияҳои иттилоот Исмоилов И.Ш. ҳамоҳангсози барномаҳои грантӣ баромад карда, ба саволҳои иштирокчиёни семинар посух доданд.
Мавриди зикр аст, ки дар доираи татбиқи лоиҳаи “Рушди таҳсилоти олӣ”, ки аз тарафи Ҳукумати Ҷумҳурии Тоҷикистон ва Бонки ҷаҳонӣ роҳандозӣ гардидааст, даври амалисозии фаъолияти нав ҷиҳати дастгирии муассисаҳои таҳсилоти олӣ касбӣ бо таҷҳизотҳои лабораторӣ ва технологияҳои иттилоотӣ оғоз гардид. Тибқи он муассисаҳои таҳсилоти олии кишвар барои дарёфт намудани таҷҳизоти таълимӣ то 20 декабри соли 2021 бояд дархостҳои худро ҷиҳати дастрас намудани таҷҳизоти таълимӣ вобаста ба талаботи воқеъӣ ва мувофиқат ба барномаҳои таълимии насли нав ба озмун пешниҳод намоянд.
Донишгоҳи техникии Тоҷикистон ба номи академик М.С. Осимӣ
About Author
